نگراں وزیراعظم انوار الحق کاکڑ نے کہا کہ تمام اداروں سے پوچھا کہ کتنی بجلی مفت استعمال کرتے ہیں؟ آئندہ 48 گھنٹوں میں بجلی کے بلوں پر ریلیف کا اعلان کریں گے۔
سینئر صحافیوں سے گفتگو کرتے ہوئے وزیراعظم انوار الحق کاکڑ نے کہا کہ پاکستان میں کوئی بحران نہیں، مشکل حالات ہیں، بجلی کے بلوں کے مسئلے کو بڑھا چڑھا کر پیش کیا جا رہا ہے، بجلی کےبل دینا ہوں گے، انٹر نیشنل مانیٹری فنڈ (آئی ایم ایف) معاہدے پر عمل کریں گے، آئی پی پیز، لائن لاسز اور چوری کی وجہ سے بجلی مہنگی ہے، حکومت نے زیادہ تر وقت بجلی کی قیمتوں کےحوالے سے لگایا۔
وزیراعظم نے کہا کہ الیکشن وقت پر ہوگا، الیکشن کروانے کا اختیار الیکشن کمیشن کے پاس ہے، الیکشن تاریخ پر سپریم کورٹ جو بھی فیصلہ کرے گی احترام کریں گے۔
انوار الحق کاکڑ نے مزید کہا کہ لاپتہ افراد کا معاملہ سنجیدہ ہے، دہشت گردی اور حساس معاملات دیکھ کر نادرا رولز میں ترمیم کی، نادرا کے معاملات بڑی حد تک ملک کی سیکیورٹی سے متعلق ہوتے ہیں۔
انہوں نے کہا کہ ملک میں مایوسی پھیلانا درست نہیں،زراعت، معدنیات اور آئی ٹی کے شعبے میں بہت صلاحیت ہے، مہنگائی ضرور ہے مگر اتنی نہیں کہ پہیہ جام ہڑتال ہو، فوج میں کوئی فری بجلی استعمال نہیں کر رہا، دفاعی بجٹ سے دے رہے ہیں، آئی ٹی، میڈیکل، سیاحت اور دفاعی پیداوار پر کام کر رہے ہیں، ملک کے ایک ایک انچ کا دفاع کریں گے۔
وزیراعظم نے کہا کہ ریاست کی رٹ کو چیلنج کرنے والوں سے سختی سےنمٹا جائے گا۔
