امیر جماعت اسلامی کراچی حافظ نعیم الرحمٰن نے بلدیہ میں گٹر میں گر کر جاں بحق ہونے والی بچی کے گھر پہنچ کر تعزیت کی۔
اس موقع پر گفتگو کرتے ہوئے حافظ نعیم الرحمٰن نے کہا کہ جس علاقے میں بچی گٹر میں گر کرجاں بحق ہوئی ہے وہاں سابق رکن اسمبلی بھی پیپلز پارٹی سے تھا۔
ان کا کہنا ہے کہ اتنے بڑے علاقے میں پیپلز پارٹی کے سابق وزیر صحت نے ڈسپنسری تک نہیں بنائی؟
انہوں نے کہا کہ 15 سال سے سندھ میں پیپلزپارٹی کی حکومت ہے، پی پی نے 15 سال میں ہمیں کیا دیا ہے؟ آج بھی ہمارے بچے گٹر میں گر کر مر رہے ہیں۔
حافظ نعیم الرحمٰن کا کہنا ہے کہ شہر میں کے الیکٹرک مافیا بنا ہوا ہے، ہمیں مافیا کے خلاف مل کر لڑنا پڑے گا، اس وقت کچے اور پکے کے ڈاکوؤں کا راج ہے۔
واضح رہے دو روز قبل کراچی کے علاقے بلدیہ مواچھ گوٹھ میں 4 سالہ بچی عمرہ بلوچ کھلے گٹر میں گر کر جاں بحق ہو گئی تھی۔
علاقہ مکینوں کا کہنا تھا کہ اس علاقے میں شاید ہی کوئی ایسا گٹر ہو جس پر ڈھکن ہو۔
