بھنڈی سے بنے پانی نے حال ہی میں خوب توجہ حاصل کی ہے جبکہ ماہرین بھی اس کے صحت پر بے شمار فوائد سے متعلق ثبوت پیش کر رہے ہیں۔
صحت سے متعلق اس رپورٹ میں ہم بھنڈی کے پانی کی دنیا بھر میں شہرت حاصل کرنے کی وجوہات اور اپنی روزمرہ کی خوراک میں اسے شامل کرنے کے پانچ حیرت انگیز اہم فوائد کا بھی انکشاف کریں گے۔
غذائی ماہرین کے بعد اب طبی ماہرین نے بھی بھنڈی سے بنے پانی کو غذائیت سے بھرپور اور طاقتور قرار دے دیا ہے جس کے چند فوائد درج ذیل ہیں۔
بہتر ہاضمہ
بھنڈی کا پانی ’سلیوبل فائبر‘ (تحلیل ہو جانے والے فائبر) سے بھرپور ہوتا ہے جو آنتوں کی صحت مندانہ فعال کو بہتر بناتا ہے، یہ ہاضمے کے لیے بہترین اور ایک قبض کشا پانی ہے۔
بھنڈی (اوکرا) کے پانی میں ایک جیل جیسا مادہ ہوتا ہے جسے ’mucilage‘ کہا جاتا ہے جو ہاضمے کو سکون بخشتا ہے، سوزش اور معدے کی تکلیف کی علامات کو کم کرتا ہے۔
بھنڈی کے پانی کا باقاعدہ استعمال نظام انہضام کو بہتر بنانے میں معاون ثابت ہو سکتا ہے۔
وزن میں کمی کا سبب
بھنڈی میں کیلوریز کی مقدار کم اور فائبر کی مقدار زیادہ پائی جاتی ہے جو زیادہ دیر تک پیٹ بھرنے میں مدد کر سکتی ہے۔
بھنڈی کے پانی میں با آسانی تحلیل ہو جانے والا ریشہ بھرپور مقدار میں پایا جاتا ہے جو بھوک کو کم کرنے کے ساتھ کھانے پینے کی غیر ضروری خواہشات کو بھی ختم کرتا ہے۔
بھنڈی کے پانی کو متوازن غذا کے ساتھ اپن روٹین میں شامل کر کے وزن میں کمی لانے کے خواہشمند افراد اپنا وزن نمایاں کم کر سکتے ہیں۔
بلڈ شوگر ریگولیشن
اگر آپ اپنے بلڈ شوگر کی سطح کی دیکھ بھال کر رہے ہیں تو بھنڈی کا پانی نہایت فائدہ مند ثابت ہو سکتا ہے۔
یہ خون میں شوگر کو کنٹرول کرنے کے لیے ممکنہ فوائد کا حامل ہوتا ہے، اس میں موجود فائبر شوگر لیولز کو بڑھنے سے روکتا ہے، بھنڈی کا پانی نظام ہضم میں شکر کے جذب ہونے کو سست اور خون میں شکر کی سطح کو مستحکم کرنے میں مدد کرتا ہے۔
اپنی خوراک میں بھنڈی کے پانی کو شامل کرکے خون میں شکر کی سطح کو مستقل طور پر مستحکم کیا جا سکتا ہے، یہ ذیابطیس سے منسلک دیگر پیچیدگیوں کے خطرے کو بھی کم کرتا ہے۔
دل کی صحت پر مثبت اثر
بھنڈی فائبر، اینٹی آکسیڈنٹس اور وٹامنز جیسے غذائی اجزاء سے بھرپور ہوتی ہے جو صحت مند دل کے لیے اہم کردار ادا کرتی ہے۔
بھنڈی میں موجود فائبر کولیسٹرول کی سطح کو کم کرنے میں مدد کر سکتا ہے جبکہ اینٹی آکسیڈنٹس سوزش کو کم کرنے اور دل کی بیماریوں سے بچانے میں مدد فراہم کرتے ہیں۔
واضح رہے کہ بھنڈی کے پانی کے استعمال کے دوران یہ یاد رکھنا ضروری ہے کہ اکیلا بھنڈی کا پانی جادوئی حل نہیں ہے۔
متوازن غذا، باقاعدہ ورزش، اور مجموعی صحت مند طرز زندگی دل کی صحت کو فروغ دینے میں اہم کردار ادا کرتے ہیں۔
جلد اور بالوں کے لیے فائدہ مند
بھنڈی کے پانی میں وٹامن سی اور بائیوٹین سمیت وٹامنز اور منرلز ہوتے ہیں جو کہ درحقیقت جِلد اور بالوں کی صحت دونوں کو فائدہ پہنچا سکتے ہیں۔
وٹامن سی ایک اینٹی آکسیڈینٹ کے طور پر کام کرتا ہے جو جِلد کو آزاد ریڈیکلز کی وجہ سے ہونے والے آکسیڈیٹیو نقصان سے بچانے میں مدد کرتا ہے۔
بائیوٹین، جسے وٹامن B7 بھی کہا جاتا ہے، مضبوط، گھنے بالوں کو فروغ دیتا ہے۔
بھنڈی کے پانی کو اپنی خوراک میں شامل کرنا یا اسے خوبصورتی کے علاج میں استعمال کرنا آپ کی جِلد، اس کی لچک اور بالوں کی صحت کو بہتر بنانے کا ایک قدرتی طریقہ فراہم کر سکتا ہے۔
بھنڈی کا پانی بنانے کا آسان طریقہ:
بھنڈی کا پانی بنانے کے لیے آپ کو تازہ بھنڈی اور پانی کی ضرورت ہے۔
بھنڈی کو دھو کر اس کے سرے اور ڈنڈی کو کاٹ لیں۔
پھر، بھنڈی کے دو دو ٹکرے کر لیں یا انہیں موٹا موٹا کاٹ لیں۔
بھنڈی کو ایک جار یا بڑے پیالے میں ڈال کر اس میں پانی شامل کر دیں۔
اب اس جار کو فریج میں رکھیں اور اسے رات بھر یا کم از کم 8 گھنٹے بعد استعمال کر لیں۔
